إلى الناس في رفح

الدكتور أحمد هشام حلس

طول روحك يا صاحبي شوية …. انتا مش نازح على دبي في الامارات ولا نازح على الدوحة في قطر ولا نازح على زيوريخ في سويسرا، انتا نازح على رفح، بتعرف شو يعني رفح؟، رفح يعني ستين كيلو متر مربع فقط، والنا عشرين سنة بنقاتل وعملنا ميت طوشة مع حكومة غزة عشان نبني لاهل رفح مستشفى وللاسف ما صار، رفح يعني مدينة بسيطة جدا بإمكانياتها المتواضعة والمحدودة وبنيتها التحتية الهشة والضعيفة، لا فيها آبار نفط ومصافي بترول، ولا الها موانئ على المحيط الاطلسي، ولا فيها مطارات للشحن الدولي، رفح جدا بسيطة كجعرافيا وامكانات، لكنها كبيرة جدا بكرم وشهامة وطيبة اهلها الاحباب، انها تستقبل عشر اضعاف عدد سكانها في ليلة ويوم هذا اسمه جنون، انو يستوطنها فورا مليون ونص نازح وحزين وخايف وغضبان ومفلس ومقهور وجعان وبردان ومريض وقرفان في لحظة، هادا اسمه خيال !!! 

ما في عند اهل رفح مليون ونص فرشة، ولا عندهم مليون ونص حرام ومخدة، ولا عملوا حسابهم لعشرة مليون لتر مية كل يوم، وما بنوا النا مليون غرفة وحمام ومطبخ، ولا البنية التحتية تبعت رفح المستوية اصلا بتقدر تستوعب كل هالاعداد، لا شوارع ولا مرافق عامة ولا محلات ومتاجر ولا مراكز صحية ولا عمال نظافة ولا قدرات خدماتية مؤهلة تغطي كل هالاعداد، هذا في الوقت الطبيعي مش في الحرب، وتنساش انو اهل رفح بينقصفوا زيك برضو، وغليت عليهم الحياة زيك، وواقعين تحت نفس الضغط المعيشي تبعك، وتعقدت عيشتهم زيك، وعلى العكس، فتحوا النا بيوتهم بكل شهامة وكرم، وقسموا معانا اللقمة والمية والفراش والخوف والتعب والقهر، ارجوك يا صديقي اياك تظلم اهل رفح بسبب اخطاء فردية حتى لو كترت، هدول ما بيمثلوا رفح ابدا، وكتير منهم مش من رفح اصلا، تنساش انو كل قطاع غزة في رفح، يعني الشخص الي مش تمام ممكن يكون من اي مكان.

شغلة تانية مهمة جدا، مش مسؤولية ابن رفح او المواطن العادي المنكوب اصلا انو يحملك ويساعدك ويعالج مشكلاتك، الاصل في حكومة والها مؤسسات كانت في الرخاء ولا تزال بتجمع ضرايب وجمارك وبتشن حروب على الاعداء وبتسعى لتحرير الكرة الارضية، يعني دورها بالقانون والعرف والدين انها تامن الجبهة الداخلية وتفعل خطط ادارة الطوارئ  وتعالج كل المشاكل الي بتحصل،، هادا دورها واحنا رعيتها الي راح ينسألوا عنا، واذا قاعد بتحكم على رفح واهلها من خلال دوار النجمة واسعار علب النسكافيه وباكيتات الشيبسي، بتكون غلطان غلط هائل، وبتكون يا صديقي لا شفت رفح ولا شفت اهلها، اهل رفح غييييير.

اسألني انا، ولا بتلاقي في نخوتهم وطيبة قلبهم، صدقني، فارجوكم يا جماعة بكفي تنمر وهمز ولمز ومزايدة على اهل رفح الحبيبة، ومش بس رفح، وكل المناطق والحارات والاحياء والعائلات الي استقبلت نازحين في كل مناطق قطاع غزة، واقسم الكم بالله حمل رفح ما بتشيله دول ذات سيادة، ولو الحمل الي شايلاه رفح حمّلناه للاردن على سبيل المثال لوقعت الاردن زمان صدقوني، انا ما قلت الصومال، خلينا نتحمل بعض ونطبطب على جروحنا بايدينا وما نقسى على بعض، بكفي الي قسيوا علينا كتير كتار….

كان الله بالعون وحسبنا الله ونعم الوكيل …..